Министрлер Кабинетинин Төрагасы, Президенттик Аппараттын Жетекчиси Адылбек Касымалиев «Жайкы Давос 2025» Дүйнөлүк экономикалык форумунун жылдык жыйынына катышуунун алкагында Улуу Британиянын мурдагы премьер-министри Тони Блэр менен жолугушту.

Министрлер кабинетинен билдиришкендей, баарлашууда мамлекеттик башкаруунун заманбап тенденциялары, туруктуу өнүгүү жана санариптик трансформация маселелери талкууланды.

Тараптар мамлекеттик башкаруунун натыйжалуулугун жогорулатуу, мамлекеттик сектордун системасына инновациялык чечимдерди жана санариптик технологияларды киргизүү, жасалма интеллектти өнүктүрүү маселелерине өзгөчө көңүл бурушту.

Министрлер Кабинетинин Төрагасы эл аралык тажрыйба алмашуунун маанилүүлүгүн белгилеп, Кыргыз Республикасынын ачык-айкындуулукка, санариптештирүүгө жана мамлекеттик кызматтардын сапатын жогорулатууга умтулуусун баса белгиледи.

Өз кезегинде Тони Блэр кыргыз тарап менен кызматташууга кызыкдар экенин, өзгөчө түрдүү тармактарда тажрыйба алмашуу маселелеринде Кыргыз Республикасынын натыйжалуу мамлекеттик башкарууну өнүктүрүү жана башкаруунун заманбап ыкмаларын киргизүү боюнча потенциалын белгиледи. Ал ошондой эле акыркы жылдары өлкөнүн социалдык-экономикалык өнүгүүсүндөгү жана башка негизги багыттар боюнча жетишилген натыйжаларга оң баа берди.

Белгиленгендей, акыркы жылдары кыргыз-британ мамилелери олуттуу активдешүү жана өнүгүү менен мүнөздөлүүдө.

Жолугушуунун жыйынтыгында тараптар мамлекеттик башкаруу, туруктуу өнүктүрүү жана социалдык чөйрөдө реформаларды ишке ашыруу маселелери боюнча тажрыйба алмашуунун келечегин белгилешти.