“Жайкы Давос – 2025” Дүйнөлүк экономикалык форумунун жылдык жыйынынын алкагында Кыргыз Республикасынын Министрлер Кабинетинин Төрагасы Адылбек Касымалиев Вьетнам Социалисттик Республикасынын Премьер-министри Фам Мин Тинь менен жолугушту.

Министрлер кабинетинин башчысы Адылбек Касымалиев Кыргыз Республикасы Вьетнам менен эки тараптуу мамилелерди жогору баалай турганын жана Вьетнам менен соода-экономикалык кызматташууну активдештирүүгө кызыкдар экенин баса белгиледи.

Өз кезегинде Вьетнамдын Премьер-министри Фам Мин Тинь эки тараптуу кызматташтыкты кеңейтүүгө кызыкдар экенин белгилеп, Вьетнам Кыргыз Республикасын Борбордук Азиядагы ишенимдүү өнөктөш катары карай турганын баса белгиледи.

Ал мурда жетишилген макулдашууларды ишке ашырууга жана приоритеттүү багыттар боюнча практикалык кызматташтыкты өнүктүрүүгө көмөк көрсөтүүгө даяр экендигин билдирди.

Сүйлөшүүнүн жүрүшүндө тараптар кыргыз-вьетнам кызматташтыгынын кеңири чөйрөсүн талкуулап, соода-экономикалык байланыштарды, инвестициялык өнөктөштүктү өнүктүрүүгө жана саясий диалогду бекемдөөгө өзгөчө көңүл бурушту.

Эки өлкөнүн өкмөт башчылары экономикалык чөйрөдөгү бир катар эки тараптуу документтерге, анын ичинде соода-экономикалык кызматташуу боюнча өкмөттөр аралык комиссия түзүү жөнүндө макулдашууга жана кош салык салуудан качуу жөнүндө макулдашууга жакын арада кол коюу максатында тараптардын кароосун тездетүүнү макулдашышты.

Жолугушуунун жыйынтыгында тараптар кыргыз-вьетнам мамилелерин мындан ары тереңдетүү каалоолорун ырасташты.