Суу чарба, айыл чарба жана кайра иштетүү өнөр жай министрлигинен билдиришкендей, министр Бакыт Төрөбаевдин тапшырмасы жана министрликтин сунуштарына ылайык Талас районунун дыйкандары тамчылатып сугаруу системасына активдүү өтүүдө.

Манас райондук суу чарба башкармалыгы Семетей айылынан 12,5 гектар кайрак жерди 5 жылга ижарага алып, жаңгак өстүрүү үчүн тамчылатып сугаруу системасы орнотулуп, ишке берилген. Айтматов районунда 100 гектар жерге тамчылатып сугаруу системасын орнотуу иштери жүрүп жатат: Сарымсак каналында 60 гектар, Ногой каналында 20 гектар, Бел каналында дагы 20 гектар аянт электр кабелдерине туташтырууга даярдалууда.

Ат-Башат айылынын дыйкандары 11 гектар аянтка тамчылатып сугаруу ыкмасын өз алдынча орнотушту. Бакай-Ата райондук суу чарба башкармалыгы тарабынан 57,5 гектар жерге мөмө-жемиш өсүмдүктөрүн тамчылатып сугаруу системасы орнотулду. Талас районунда дыйкан Алматыдан көчмө жамгыр менен сугаруу системасын алып келип, аны ийгиликтүү колдонууда.

«Тамчылатып сугаруу сууну үнөмдөөчү эң эффективдүү технологиялардын бири болуп саналат, ал сууну 50-70%га кыскартууга, айыл чарба өсүмдүктөрүнүн түшүмдүүлүгүн жогорулатууга, топурактын шорланышын азайтууга жана өсүмдүктөрдүн тамырын бирдей нымдаштырууну камсыз кылууга мүмкүндүк берет», – деп түшүндүрүштү ведомстводон.