Алматыда Казакстан Республикасынын Коргоо министрлигинин Тынчтыкты сактоо операциялары борборунда Борбордук Азия өлкөлөрүнүн аскер-медициналык кызматкерлеринин жардыргыч заттарды, курал-жарактарды зыянсыздандыруу боюнча операцияларды медициналык жактан камсыз кылуу жаатындагы квалификациясын жогорулатууга багытталган аймактык курс ачылды.

ЕККУнун Душанбе шаарындагы Программалык кеңсеси Казакстан Республикасынын Коргоо министрлигинин Курал-жарактарды көзөмөлдөө жана инспекциялоо борбору менен биргеликте уюштурган курс экстремалдык шарттарда биринчи жардам көрсөтүү үчүн зарыл болгон теориялык билимдерди да, практикалык көндүмдөрдү да камтыйт. Өзгөчө көңүл миналарды тазалоо иштерине мүнөздүү болгон стандарттуу эмес кырдаалдарда иш-аракеттерди жүргүзүүгө бурулат.

Курс программасы эл аралык стандарттарды эске алуу менен иштелип чыккан жана реалдуу шарттарга мүмкүн болушунча жакын. Курстун катышуучулары Казакстан Республикасынын Коргоо министрлигинин Аскердик медицина борборунда теориялык аспектилерди гана үйрөнбөстөн, практикалык көндүмдөргө да машыгышат.

Бул курс Борбордук Азия өлкөлөрүнүн ортосундагы кызматташтыкты бекемдөөгө жардам берип, аймактагы аскер кызматкерлеринин коопсуздугун жана ыкчам даярдыгын жогорулатуудагы маанилүү кадам болуп саналат.Сүрөт: Казакстан Республикасынын Коргоо министрлиги