9-июлда Бишкекте грек-рим күрөшү боюнча 20 жашка чейинки өспүрүмдөр (U-20) арасындагы Азия чемпионатынын биринчи күнү жыйынтыкталды.

Кыргызстандын жаштар курамасы мыкты жыйынтык көрсөтүп, 1 алтын, 1 күмүш жана 1 коло медалга ээ болушту.

63 килограмм салмакта Эмирлан Дүйшөналиев алтын медаль тагынып, Азия чемпиону аталды. Ал финалдык беттеште индиялык балбан Варунду 8:0 эсебинде ишенимдүү жеңип, өлкөгө көптөн күткөн жеңишти тартуулады. Бул Акжол Махмудов чемпион болгон 2017-жылдан берки өспүрүмдөр арасындагы Азия чемпионатында Кыргызстан үчүн биринчи алтын медаль.

55 килограммга чейинки категорияда Кутман Калбаев күмүш медаль тагынды. Финалда ал буга чейин кадеттер арасында дүйнө чемпиону болгон ирандык Паям Ахмади Балутакиге утулуп калды.

77 килограммга чейинки салмак ченинде Адилет Абыкеев коло медаль тагынды. Үчүнчү орун үчүн күрөштө Өзбекстандын өкүлү Бекмурод Рустамов менен кез келди. 1:1 эсеби тең болуп, жеңиш кыргызстандыктарга күрөштүн соңунда активдүүрөөк аракети үчүн ыйгарылды.

Мелдеш уланууда. Бүгүн, 10-июлда килемге төмөнкү салмак категориялары боюнча балбандар чыгышат:

• 60 кг – Эрбол Өзгөнов;
• 67 кг – Жанторо Мирзалиев;
• 72 кг – Илгис Каныбеков;
• 82 кг – Мирсаид Юнусов;
• 97 кг – Рустам Садыков.

Кыргызстандын жаштар курамасынын башкы машыктыруучусу – Рыскулбек Эгеев.