Суу ресурстары, айыл чарба жана кайра иштетүү өнөр жай министри Бакыт Төрөбаев баштаган делегация Парижде Бүткүл дүйнөлүк жаныбарлардын саламаттыгы уюмунун (WOAH) башкы директору Эммануэль Субейран менен жолугушту.

Жолугушууда ветеринария тармагын өнүктүрүү, малдын саламаттыгын сактоо жана эл аралык кызматташтыкты чыңдоо боюнча бир катар маселелер талкууланды. Тараптар мындан аркы кызматташуунун багыттарын белгилешип, конкреттүү пландарды карап чыгууга макулдашышты.

Ошондой эле тараптар ветеринардык кадрларды даярдоо, лабораториялык базаны чыңдоо жана маалымат алмашуу боюнча биргелешкен программаларды ишке ашыруу зарылдыгын белгилешти. Бул кызматташтык Кыргызстандын айыл чарбасындагы экспорттук мүмкүнчүлүктөрүн кеңейтүүгө да салым кошот.

Белгилей кетсек, Кыргызстан үчүн приоритеттүү багыттардын бири мал ылаңдарынын алдын алуу, диагностикалык мүмкүнчүлүктөрдү кеңейтүү жана эл аралык стандарттарга ылайык иш алып баруу болуп саналат.

Бул жолугушуу Кыргызстан менен Бүткүл дүйнөлүк жаныбарлардын саламаттыгын сактоо уюмунун ортосундагы өз ара аракеттенүүнүн жаңы этабын ачары күтүлүүдө.