2025-жылдын 30-июлунда Кыргыз Республикасынын Энергетика министри Таалайбек Ибраев GRK Solar Energy компаниясынын башкы директору Асанбек Төрөев менен жолугушту.

Жолугушуунун жүрүшүндө министр Бишкек шаары, 7-Апрель көчөсү, 4а/2 корпусу дарегинде жайгашкан «ГРК Солар Энерджи» ЖЧКсынын кеңсесинин сыртына жана чатырына орнотулган күн электр станциясы менен таанышты.

Күн электр станциясы орнотулган имарат мурда эски цех болуп, жараксыз абалга келген. Компания имаратты сатып алып, оңдоп-түзөөдөн өткөрүп, фасадына жана чатырына жалпы кубаттуулугу 1 МВт болгон күн электр станциясын орноткон. Күн батареясын орнотуу 8 айдын ичинде бүткөрүлдү. Сметалык баасы 1100 миң АКШ долларын түзгөн. Жылдык орточо электр энергиясын өндүрүү 1,1671 млн кВт саатты түзөт.

Буга чейин «GRK Solar Energy» ЖЧКсы КР Энергетика министрлигине караштуу Отун-энергетика комплексин жөнгө салуу департаментинен лицензия, «Кыргызстандын улуттук электр тармагы» ААКдан техникалык шарттарды алып, өндүрүлгөн электр энергиясын сатуу келишимин түзгөн. Бүгүн компания өз ишмердүүлүгүн көрсөтүп, күн электр станциясын ишке киргизди. Жыйынтыгында «НЕСК» ААКсы мурда түзүлгөн келишимдин негизинде күн электр станциясынан өндүрүлгөн электр энергиясын сатып ала баштайт.

Компаниянын мындан аркы максаты – кытайлык компания менен биргеликте эски цехтин ордуна күн батареяларын чыгаруучу завод куруу жана Кыргызстанда күн электр станцияларын өнүктүрүү.

Жолугушууда тараптар энергиянын кайра жаралуучу булактарын өнүктүрүү жана өлкөдөгү энергия тартыштыгын жоюуга багытталган долбоорлорду биргелешип ишке ашыруу маселелерин талкуулашты. Ошондой эле, «GRK Solar Energy» ЖЧКсынын башкы директорунун айтымында, Токтогул суу сактагычында, Таш-Көмүр шаарында жана башка аймактарда күн электр станцияларын куруу пландалууда.

Жолугушуунун жыйынтыгында Энергетика министрлиги менен «GRK Solar Energy» ЖЧКсынын ортосунда энергиянын кайра жаралуучу булактарын өнүктүрүү боюнча өз ара түшүнүшүү жөнүндө меморандумга кол коюлду. Документке энергетика министри Т.Ибраев жана «ГРК Solar Energy» ЖЧКсынын башкы директору А.Төрөев кол коюшту.