Кыргыз Республикасынын Министрлер Кабинети тарабынан Кыргыз Республикасынын Өкмөтүнүн 2014-жылдын 16-июнундагы №332 "Кыргыз Республикасынын эркин экономикалык зоналарынын аймагын өнүктүрүү талаптары жөнүндө жобону бекитүү жөнүндө" токтомуна өзгөртүүлөрдү киргизүү жөнүндө токтомдун долбоору иштелип чыкты.
Түзөтүүлөрдүн максаты – туризм тармагына инвестицияларды тартуу үчүн жагымдуу шарттарды түзүү, көргөзмө иш-чараларында инвесторлорду колдоону камсыз кылуу жана Бишкектеги мурдагы Батыш автобекетинин имаратын (Жибек Жолу проспектиси, 605) винтаждык унаалар музейине айландыруу боюнча Инвестициялык келишимдин шарттарын ишке ашыруу. Келишимге 2025-жылдын 28-апрелинде Кыргыз Республикасынын Министрлер Кабинети менен Invest KG Holding LLC компаниясынын ортосунда кол коюлган.
Токтомдун долбоорунда төмөнкүлөр каралган:
- эл аралык тажрыйбаны эске алуу менен эркин экономикалык зоналардагы туристтик объектилер үчүн тосмо материалдарына жаңы техникалык талаптарды белгилөө (мисалы, Лувр же Улуу Египет музейиндеги сыяктуу айнек фасаддар);
- заманбап архитектуралык стандарттарга жана борбордун шаардык ландшафтына жооп берген тосмолорду түзүү;
- эркин экономикалык зонанын атайын режимин сактоо менен, чет элдик туристтерди кошо алганда, ретро унаалар көргөзмө комплексине баруу эрежелерин иштеп чыгуу;
- жыл бою үй-бүлөлүк туризм үчүн Кыргызстандын эл аралык жагымдуулугун жогорулатуу;
- көргөзмө комплексинин айланасында түзүлгөн жайлардан салыктык кирешелердин көбөйүшү.
Долбоор 2025-жылдын 31-августуна чейин бүткөрүлөт деп күтүлүүдө, ал эми жалпы инвестиция 875 миллион сомдон ашат.
Өзгөртүүлөр көргөзмө комплексинин визуалдык тунуктугун жана коопсуздук стандарттарына шайкештигин камсыз кыла турган заманбап жана эстетикалык жактан ачык тосмолорду түзүүгө багытталган.
2026-жылдын 17-январы, саат 7:33:22