2025-жылдын 17-майында Балдарды коргоонун эл аралык күнүн утурлай Тышкы иштер министрлиги Бишкекте Курманжан Датке эстелигинин алдындагы аллеяда («Ала-Тоо» кинотеатрынын жанында) дипломатиялык кайрымдуулук жарманкесин уюштурду.

Иш-чарага Кыргыз Республикасынын Тышкы иштер министри Жээнбек Кулубаев, Кыргызстанда аккредитацияланган он бештен ашык чет мамлекеттердин дипломатиялык өкүлчүлүктөрүнүн жана эл аралык уюмдардын жетекчилери жана өкүлдөрү, ошондой эле Ардактуу консулдар клубунун мүчөлөрү катышты.

Жарманкенин коноктору ар кайсы өлкөлөрдүн улуттук тамак-аштарынан даам тата алышты. Иш-чаранын катышуучуларынын маданий көп түрдүүлүгүн чагылдырган уникалдуу кол өнөрчүлүк, оригиналдуу сувенирлер жана башка буюмдар өзгөчө кызыгууну жаратты.

Жарманкенин меймандары үчүн да бай концерттик программа уюштурулду. Сахнага кыргыз эстрадасынын жылдыздары, чет элдик артисттер жана балдардын чыгармачылык топторунун жаш таланттары катышып, дүйнө элдеринин музыкалык жана бий номерлерин тартуулашты.

Жыл сайын өтүүчү Дипломатиялык кайрымдуулук жарманкеси достук байланыштарды чыңдоо жана маданияттар аралык диалогду өнүктүрүү үчүн маанилүү аянтча болуп саналат.

Иш-чаранын жүрүшүндө чогулган бардык каражаттар Кыргызстандагы балдар үйлөрүн колдоого жумшалат.