Кыргыз Республикасынын Экономика жана коммерция министринин орун басары Санжар Болотов Кыргыз Республикасынын Экономика жана коммерция министрлиги менен кореялык компаниялар – EVSIS, Кореянын экологиялык таза унаалар ассоциациясы жана NGS ортосундагы өз ара түшүнүшүү жөнүндө меморандумга кол койду.

Документте Бишкек шаарында экологиялык таза электр транспортун кубаттоо үчүн инфраструктураны өнүктүрүү боюнча долбоорду биргелешип ишке ашыруу каралган.

Меморандум кызматташтыкты тереңдетүүгө багытталган жана төмөнкү негизги багыттарды камтыйт:

• электр транспорту үчүн заманбап заряддоо инфраструктурасын түзүү жана иштетүү;

• абанын сапатын жакшыртууга жана көмүртектин эмиссиясын кыскартууга салым кошуу;

• ченемдик укуктук база жана тармактык тенденциялар боюнча тажрыйба жана маалымат алмашуу;

• экологиялык жактан таза транспортту жайылтуу үчүн маалыматтык-билим берүү кампанияларын өткөрүү.

Долбоордун алкагында Корея тарап дагы Кыргыз мамлекеттик техникалык университети менен техникалык окутуу жана стажировка программаларын ишке ашыруу боюнча кызматташууну пландаштырууда. Өндүрүш менен академиялык коомчулуктун өз ара аракеттенүү системасын калыптандырууга өзгөчө көңүл бурулат, ал даярдалган адистерди ишке орноштурууну жана заряддоо инфраструктурасын эксплуатациялоо жаатында жергиликтүү экспертизаны өнүктүрүүнү камсыз кылат.