Кыргыз Республикасынын Министрлер Кабинетинин Төрагасынын орун басары – Суу чарба, айыл чарба жана кайра иштетүү өнөр жай министри Бакыт Төрөбаев Хунань провинциясынан келген кытайлык өнөктөштөр менен жолугушуу өткөрдү. Кытайлык делегацияны Кытай Эл Республикасынын Хунань провинциясынын соода департаментинин директорунун орун басары жетектеди.
Жолугушууда Кытай менен Кыргызстандын лидерлеринин ортосунда энергетика, айыл чарба, алдыңкы технологиялар, өндүрүш жана кайра иштетүү тармактарында жетишилген биргелешкен долбоорлор жана макулдашууларды ишке ашыруунун жүрүшү талкууланды.
Өз сөзүнүн жүрүшүндө Hunan Jinxin Environmental Protection Co., Ltd компаниясынын башкы директору Дай Даогу Кыргызстандын өкмөтүнө Бишкек шаарындагы катуу таштандыларды кайра иштетүү боюнча экотехнологиялык заводдун курулушуна колдоо көрсөткөндүгү үчүн ыраазычылык билдирди.
Бакыт Төрөбаев өз кезегинде долбоордун ишке ашырылышына ийгиликтерди каалап, анын Республика үчүн маанисин белгиледи. Ал ошондой эле Хунань провинциясындагы Кытайдын мамлекеттик жана жеке ишканаларын Кыргызстанда бизнести өнүктүрүүгө жана биргелешкен инвестициялык долбоорлорду ишке ашырууга катышууга чакырды.
Буга чейин, 2024-жылдын март айында Кыргыз Республикасынын Министрлер Кабинетинин Төрагасы – Кыргыз Республикасынын Президентинин Аппаратынын Жетекчиси Акылбек Жапаров Бишкек шаарында экотехнологиялык заводдун курулушун баштаган. Ишкана катуу таштандыларды кайра иштетүү жолу менен электр энергиясын өндүрүүсү күтүлүүдө. Объекттин курулушун аяктоо жана ишке киргизүү 2025-жылдын аягына пландалууда.
Сүрөт: Кыргыз Республикасынын Министрлер Кабинети