Борбордук Азиянын жана Кавказдын тоолуу райондорунда олуттуу климаттык жана экологиялык өзгөрүүлөр болуп жатат. Акыркы ондогон жылдар аралыгында аймак мөңгүлөрдүн дээрлик үчтөн бирин жоготкон жана ар бир мүнөт сайын 9 чарчы метрге чейин түшүмдүү топурактан ажырап, чөлгө айланган.

Тоолуу экосистемалардын алдында турган көйгөйлөр — мөңгүлөрдүн тез эриши, дарыялардын кургашы, кыртыштын деградациясы жана биологиялык ар түрдүүлүктүн жоголушу — эл аралык диалогду жана макулдашылган чечимдерди талап кылат. Мындай аянтчалардын бири 2025-жылдын октябрь айында Махачкалада (Дагестан Республикасы, Россия) өтө турган “Тоолуу аймактарды туруктуу өнүктүрүү” II Эл аралык форуму болот.

Форумда климаттын өзгөрүшүнө жана социалдык-экономикалык чакырыктарга адаптациялоо механизмдерин иштеп чыгуу, ошондой эле экологияга багытталган чечимдерди кабыл алууда муниципалитеттердин ролун күчөтүү маселелери талкууланат. Өзгөчө басым суу коопсуздугу, кыртышты коргоо, чөлгө айлануу менен күрөшүү жана тоолуу элдердин маданий мурастарын сактоого бурулат.

Форумга ар кайсы өлкөлөрдөн мамлекеттик органдардын, илимий коомчулуктун, бизнес чөйрөсүнүн, массалык маалымат каражаттарынын жана коомдук уюмдардын өкүлдөрү катышат.

Иш-чара КМШ Парламенттер аралык ассамблеясы, Россия Федерациясынын Федерация Кеңеши, Дагестан Республикасынын Өкмөтү, Россия Илимдер академиясы жана Россия Федерациясынын Коомдук палатасы тарабынан уюштурулууда. Форум тоо экосистемаларын жана миллиондогон адамдар үчүн туруктуу келечекти сактоодо мамлекеттердин жана аймактардын күч-аракеттерин бириктирүү максатында уюштурулган.