28-29-апрелде Бразилияда 6-7-июлга белгиленген БРИКСтин 17-саммитине даярдыктын алкагында БРИКСтин тышкы иштер министрлеринин жыйыны өтүүдө.

Бразилиянын тышкы иштер министри Мауро Виейра БРИКС өлкөлөрү эсептешүү үчүн жаңы валюта түзүү маселесин караштырбай жатканын билдирди.

"Жаңы валюталарды алмаштыруу же түзүү боюнча эч кандай долбоор жок. Транзакциялык чыгымдарды кыскартууга кызыкдар", – деп Бразилиянын БРИКСтеги төрагалыгынын расмий сайты анын сөзүн келтирет.

Орусиянын тышкы иштер министри Сергей Лавров БРИКСтин бирдиктүү валютасына өтүү тууралуу сөз кылуу эрте экенин, бул маселени керектүү финансылык-экономикалык шарттар түзүлгөндө кароого болорун баса белгиледи.

Ошол эле учурда Орусия БРИКС алкагында космостук кыймылдын коопсуздугу боюнча жумушчу топ түзүүнү сунуштады, – деди Роскосмостун башкы директору Дмитрий Баканов.

"Космостогу спутниктердин санынын өсүшү менен космостук кыймылдын коопсуздугу боюнча маселе жаралууда. Ушуга байланыштуу биз БРИКС өлкөлөрүнүн космостук агенттиктеринин ортосунда космостук операциялардын коопсуздугун камсыз кылуу боюнча ниет протоколунун долбоорун сунуштадык. Биз биргелешкен жумушчу топ түзүүнү жана бул ниеттерди ишке ашыруу боюнча жол картасын иштеп чыгууну сунуштайбыз", – деп белгиледи БРИКС агенттиктеринин башчыларынын жыйынында Баканов.

1-январда БРИКСке төрагалык кылуу Бразилияга өттү. 2024-жылы Орусия бул ролду ойноп, анын төрагалыгынын негизги окуясы Казандагы 16-саммит болду.