2025-жылдын 18-июлунда Черногориянын Подгорица шаарында Кыргыз Республикасынын Черногориядагы элчиси Руслан Казакбаев менен Черногориянын Соода-өнөр жай палатасынын президенти Нина Дракичтин жолугушуусу болуп өттү.

Жолугушуунун жүрүшүндө тараптар эки тараптуу сооданы көбөйтүү жана биргелешкен экономикалык демилгелерди ишке ашыруу перспективаларын талкуулашты.

Элчи Р.Казакбаев Кыргызстанда өлкө жетекчилиги тарабынан жүргүзүлүп жаткан экономикалык реформалар тууралуу маалымат берип, ошондой эле агроөнөр жай комплекси, энергетика, тоо-кен өндүрүшү жана туризм сыяктуу потенциалдуу кызматташуунун негизги багыттарын белгиледи.

Кыргызстандын инвестициялык потенциалына, анын ичинде “Ала-Тоо курорт” лыжа кластерин куруу долбооруна өзгөчө көңүл бурулду. Мындан тышкары, Элчи Р.Казакбаев бизнес-форумду жана Черногориянын бизнес делегациясынын Кыргызстанга иш сапарын уюштурууну сунуштады, ошондой эле Нина Дракичти Кыргыз Республикасынын Соода-өнөр жай палатасы менен байланыш түзүү үчүн биздин өлкөгө келип кетүүгө чакырды.

Жолугушуунун жыйынтыгында кыргыз тарап эки өлкөнүн Соода-өнөр жай палаталарынын ортосунда кызматташуу боюнча Меморандум түзүү, ошондой эле бир катар биргелешкен иш-чараларды уюштурууну сунуштады.

Элчи Р.Казакбаев ошондой эле Түркиянын жана Россиянын Черногориядагы элчилери менен жумушчу жолугушууларды өткөрдү, анын жүрүшүндө өкүлчүлүктүү мамлекеттер менен Черногория жана Балкан чөлкөмүнүн башка өлкөлөрүнүн ортосундагы кызматташтык маселелери боюнча пикир алмашуу болду.