11-сентябрда Евразия экономикалык комиссиясында эл аралык уюмдар жана ассоциациялар ушул темага арналган тегерек столдун жүрүшүндө Евразия экономикалык биримдигинин өлкөлөрүнүн глобалдык агроазык-түлүк системасындагы жогорку ролун белгилешти.

ЕАЭБ, ШКУ, ФАО, IOFS, КМШ жана Эл аралык дан кеңешинин өкүлдөрү азык-түлүк коопсуздугу жаатында улуттук жана аймактык стратегияларды ишке ашыруу боюнча тажрыйба алмашышты.

Анда эгиндин, канттын эл аралык соодасы, айыл чарба өсүмдүктөрүн тандоо, дүйнөлүк азык-түлүк рыногундагы структуралык жылыштар маселелерине көңүл бурулду. Айыл чарба продукциясынын экспортун камсыздандырууну колдоо чаралары, ЕАЭБ өлкөлөрүнүн өндүрүүчүлөрүнүн атаандаштыкка жөндөмдүү агроазык-түлүк чынжырларына катышуусунун перспективалары каралды.

Иш-чарага ШКУнун Башкы катчысынын орун басары Т.Р. Мидхун, Азык-түлүк коопсуздугу боюнча Ислам уюмунун башкы директорунун орун басары Хусрав Нозири, ФАОнун Россия Федерациясы менен байланыш бюросунун директору Олег Кобяков, Эл аралык дан кеңешинин аткаруучу директору Арно Петит, ЕАЭБ өлкөлөрүнүн ыйгарым укуктуу мамлекеттик органдарынын, айыл чарба тармагындагы тармактык бирикмелердин жана ассоциациялардын өкүлдөрү катышты.