ООГАНСТАН, 2026-жылдын 30-январы – Karavan Info маалымат агенттиги. Улуу Британиянын мурдагы премьер-министри жана БУУнун глобалдык билим берүү боюнча атайын өкүлү Гордон Браун эл аралык коомчулуктун Талибан менен болгон мамилесиндеги ийкемдүүлүк жана компромисс саясаты ишке ашпай калганын жана Ооганстандагы аялдар менен кыздарга карата эзүүнү ого бетер күчөткөнүн билдирди.

Анын айтымында, талибдер өлкөнүн экономикалык жана гуманитардык келечегине олуттуу коркунуч келтирип, анын туруктуу өнүгүүсүнө жана социалдык туруктуулугуна доо кетирет.

Браун бул билдирүүлөрдү The Guardian гезитине жазган макаласында аялдар менен кыздарга карата кысымдын күчөп баратканын, ошондой эле алардын өлкө боюнча билим алууга мүмкүнчүлүгүнүн иш жүзүндө жоктугун кеңири баяндаган.

Анын пикиринде, болуп жаткан окуялар "Кандагардагы экстремисттик диний лидерлердин Кабулда жайгашкан министрлерди жеңгенин" көрсөтүп турат, бул кыймылдын өзүндөгү ички бөлүнүүнү чагылдырат.

Браун мындай аракеттерди Бириккен Улуттар Уюму адамзатка каршы кылмыш катары классификациялай аларын баса белгиледи. Ал ошондой эле аялдар менен кыздарга карата системалуу түрдө кысым көрсөтүлүп жаткан шартта талибдер менен байланыштарды кеңейтүүгө жана дипломатиялык байланыштарды калыбына келтирүүгө аракет кылып жаткан бир нече өлкөлөрдүн позициясын сынга алды.

Браун репрессиялардын күчөшүн Талибан кыймылынын жогорку лидери Хайбатулла Ахундзада тарабынан түздөн-түз жүргүзүлгөн саясат менен байланыштырып, ошол эле учурда Кабулдагы айрым талиптер аялдардын экономикага жана билим берүү системасына катышуу зарылдыгын түшүнөрүн белгиледи.

Ал сөзүн жыйынтыктап жатып, кыздарды билим алуудан ажыратуу узак мөөнөттүү келечекте талиптердин кулашына алып келерин, анткени 43 миллиондон ашык калкы бар Ооганстан буга чейин эле катуу азык-түлүк жетишсиздигине жана кеңири жайылган начар тамактанууга туш болуп жатканын айтты.

БУУнун сүрөтү/Луис Фелипе