Казакстандын Орусиядагы элчиси Даурен Абаев Мордовия Республикасына жумушчу сапар менен барды.
Республиканын башчысы Артем Здунов менен болгон жолугушууда кызматташуунун учурдагы маселелери талкууланды.
Казакстан Мордовиянын негизги соода өнөктөштөрүнүн бири. 2025-жылдын аягына карата соода жүгүртүүсү 149 миллион долларды түзүп, мурунку жылга салыштырмалуу 13% га өскөн. Андан тышкары, Казакстан Мордовиянын экспорттук багыттарынын арасында биринчи орунда туруп, республиканын жалпы экспорт көлөмүнүн 42% түздү.
Ошондой эле өнөр жай тармагында да маанилүү кызматташтык өнүгүп жатат. Казакстандын рыногунда Мордовия ишканаларынын продукцияларына суроо-талап жогору бойдон калууда. Ишкердик байланыштарды кеңейтүү үчүн элчи темир жол вагондорун жана нефтехимиялык жабдууларды чыгаруучу алдыңкы "Рузхиммаш" ААКсына барды.
Тараптар өнөр жай кооперациясы, айыл чарбасы, азык-түлүк өндүрүшү жана электроника жаатында кызматташуу үчүн чоң мүмкүнчүлүктөр бар экенин баса белгилешти.
Маданий-гуманитардык байланыштардын динамикалуу жана маңыздуу өнүгүшүнүн маанилүү белгиси Саранск шаарында казак киносунун күндөрүнүн жана "Казакстан – талаалар менен тоолордун симфониясы" аттуу фотокөргөзмөнүн өткөрүлүшү болду.
Элчи ачылыш аземинде белгилегендей, фотография, кино, музыка, образ жана эмоция аркылуу адамдар бири-бирин жакшыраак түшүнө башташат, ички жакындыкты сезишет жана башка өлкөнүн сулуулугун ачышат.
«Биз Мордовиянын тургундары ушул күндөрү заманбап Казакстанды жакшыраак таанып-биле ала тургандыгына чын жүрөктөн кубанычтабыз», – деп баса белгиледи Д. Абаев.
Өз кезегинде Мордовия Республикасынын маданият, улуттук саясат жана архив министри Светлана Баулина бул иш-чараны элдерди бириктирген чыныгы достук көпүрөсү деп атады. Ал Кино күндөрү жана фотокөргөзмө Мордовиянын тургундарына казак элинин жан дүйнөсүн, тарыхын, кең талааларын жана шаарларынын заманбап көрүнүшүн ачып берет деп ишенерин билдирди.
Казакстан киносунун күндөрүнүн алкагында "Композитор", "Жаксылык" жана "Амре" көркөм тасмаларынын көрсөтүлүшү өтүүдө.
"Казакстан – талаалар менен тоолордун симфониясы" аттуу фотокөргөзмөдө алматылык фотограф Павел Теняковдун эмгектери көрсөтүлөт. Анын сүрөттөрү өлкөнүн ар түрдүүлүгүн чагылдырып, ар бир кадр анын табигый жана маданий мурасынын тереңине сүңгүп кирет.
Булак: Казакстан Республикасынын Россия Федерациясындагы элчилиги