1-августта Кыргыз Республикасынын Президенти Садыр Жапаров Чолпон-Ата шаарында Казакстан Республикасынын вице-премьер-министри, тышкы иштер министри Мурат Нуртлени кабыл алды. Бул тууралуу мамлекет башчынын басма сөз кызматы билдирди.

Жолугушуунун жүрүшүндө эки тарапты кызыктырган бардык чөйрөлөрдө кыргыз-казак эки тараптуу кызматташуусунун актуалдуу маселелери, анын ичинде өлкөлөр ортосундагы артыкчылыктуу долбоорлорду ишке ашыруу, анын ичинде Камбар-Ата ГЭС-1ди куруу маселелери талкууланды.

Мамлекет башчысы мамлекеттер аралык мамилелерди ырааттуу кеңейтүүгө, аларды практикалык мазмун менен толтурууга өбөлгө түзүп жаткан бардык деңгээлдеги саясий диалогдун динамикалуу тереңдеп баратканын белгиледи.

Садыр Жапаров ошондой эле Казакстандын Тышкы иштер министрлигинин башчысынын расмий сапары бир туугандык мамилелерди мындан ары чыңдоо үчүн маанилүү стимул болуп каларына ишенимин билдирди, айрыкча Казакстандын президентинин Кыргызстанга боло турган расмий сапарына даярдык көрүүнүн алкагында.

Өз кезегинде Мурат Нуртлеу Садыр Жапаровго Казакстандын Президенти Касым-Жомарт Токаевдин саламын жана жакшы каалоолорун айтты.

Ал ошондой эле мамлекет башчылары тарабынан коюлган милдеттерди ишке ашыруу үчүн бардык күч-аракетин жумшоого даяр экенин ырастады.

Жолугушуунун соңунда Президент Садыр Жапаров Казакстан Республикасынын Президенти Касым-Жомарт Токаевге ысык салам жолдоп, Казакстандын Тышкы иштер министрлигинин башчысына жооптуу мамлекеттик ишмердигинде мындан аркы ийгиликтерди каалады.

01.08.2025 19:57:44