Исламабад, 10-сентябрь, 2025-жыл – Караван Инфо маалымат агенттиги.Пакистанга расмий сапарынын алкагында Казакстандын вице-премьер-министри жана тышкы иштер министри Мурат Нуртлеу пакистандык ири компаниялардын жетекчилиги менен жолугушуп, экономикалык кызматташуунун келечегин талкуулады.

Фаужи фондунун башкы директору Анвар Али Хайдер менен жолугушууда айыл чарба, жер семирткичтерди, тамак-аш азыктарын жана курулуш материалдарын өндүрүү боюнча биргелешкен долбоорлорду ишке ашыруу мүмкүнчүлүктөрү талкууланды. Тараптар биргелешкен пландарды ишке ашыруу үчүн Фаужи фонду менен Самрук-Казынанын ортосундагы байланыштарды активдештирүүнү макулдашышты.

Улуттук логистикалык корпорациянын башкы директору Фаррух Шахзад менен транспорттук-логистикалык өнөктөштүктү өнүктүрүүнүн келечеги талкууланды. Казак делегациясы эки өлкөнүн потенциалын эффективдүү пайдаланып, өз ара жүктөрдү көбөйтүүчү биргелешкен транспорттук-логистикалык консорциум түзүүнү сунуштады.

TCS Logistics компаниясынын төрагасы Халид Наваз Аван Мурат Нуртлеу менен Казакстандын инфраструктуралык долбоорлоруна катышууну талкуулады. Министр транспорттук-логистикалык инфраструктураны өнүктүрүү Казакстан үчүн стратегиялык приоритет экенин, анын ичинде Афганистан аркылуу Евразия жана Борбордук Азияны Пакистан менен байланыштырып, Перс булуңуна, Африкага жана Түштүк-Чыгыш Азияга чыгууга мүмкүндүк бере турган темир жолдун курулушун белгиледи.

Жолугушуулардын жыйынтыгында казак тарап мындан аркы диалогго жана бардык талкууланган демилгелерди ишке ашырууга даяр экендигин билдирди.

Сүрөт:Казакстан Республикасынын Тышкы иштер министрлиги