2024-жылдын 8-июлунда Казакстан Республикасынын Премьер-министринин орун басары – Тышкы иштер министри Мурат Нуртлеу Казакстанда расмий сапар менен жүргөн Түркмөнстандын Министрлер Кабинетинин Төрагасынын орун басары, Тышкы иштер министри Рашид Мередов менен жолугушту.

Тараптар казак-түркмөн кызматташтыгын өнүктүрүүнү, анын ичинде саясий, соода-экономикалык, транзиттик-транспорттук, энергетикалык жана маданий-гуманитардык чөйрөлөрдө өз ара аракеттенүүнүн келечегин, ошондой эле жогорку жана  эң жогорку деңгээлдеги боло турган эл аралык иш-чаралардын графигин талкуулашты.

Казакстандын Тышкы иштер министрлигинин башчысы түркмөн кесиптешин Түркмөнстандын Казакстандагы маданият күндөрүнүн ийгиликтүү өтүшү, ошондой эле Астанада түркмөн ойчулу жана акыны Магтымгулы Фрагинин эстелигинин ачылышы менен куттуктады.

Буга чейин, 27-майда Астанада тышкы иштер бөлүмдөрүнүн жетекчилери да сүйлөшүүлөрдү өткөргөн.

Эки тараптуу мамилелердин саясий аспектилеринен тышкары соода-экономикалык өз ара аракеттенүүнү өнүктүрүү маселелери каралды. Акыркы беш жылдын ичинде Казакстан менен Түркмөнстандын ортосундагы өз ара сооданын көлөмү дээрлик 4 эсе өстү. 2023-жылы эле соода жүгүртүү 28 пайызга өсүп, 563 млн долларга жеткен.

«Үстүбүздөгү жылдын биринчи кварталында эки өлкөнүн ортосундагы соода жүгүртүүнүн көлөмү 100 миллион доллардан ашты. Позитивдүү тенденциялар мамлекет башчыларынын жакынкы келечекте өз ара соода жүгүртүүбүздү 1 миллиард долларга жеткирүү боюнча тапшырмасын аткарууга чоң ишенимди жаратат», – деп белгиледи андан соң М.Нуртлеу.

Өз кезегинде Түркмөнстандын өкүлү Казакстанды колдоорун билдирди.

«Түркмөнстан өз кезегинде дүйнөлүк жана аймактык деңгээлде бардык демилгелерин жана сунуштарын ишке ашырууда Казакстанды колдойт. Биздин бүгүнкү сүйлөшүүлөр Түркмөнстан менен Казакстандын ортосундагы кызматташтыктын мындан аркы өнүгүшүнө салым кошот деп ишенем», – деди Р.Мередов.

Жолугушууда аймактык кызматташтыкты тереңдетүүнүн маанилүүлүгү, атап айтканда 21-кылымда Борбор Азияны өнүктүрүү үчүн достук, жакшы коңшулук жана кызматташтык жөнүндө беш тараптуу келишимге кол коюу процедурасын аяктоо зарылчылыгы баса белгиленди.

Сүрөттө: Казакстандын Тышкы иштер министрлиги