Тяньцзинь, 16-июль, 2025-жыл – Караван Инфо маалымат агенттиги.Кытайдын Тяньцзинь шаарында Казакстан Республикасынын вице-премьер-министри – Тышкы иштер министри Мурат Нуртлеу Шанхай кызматташтык уюмуна (ШКУ) мүчө-мамлекеттердин тышкы иштер министрлер кеңешинин кезектеги жыйынына катышты.

Жолугушуунун жүрүшүндө министрлер учурдагы эл аралык кырдаалда ШКУга мүчө-мамлекеттердин тышкы саясатын координациялоону тереңдетүү маселелери боюнча пикир алышты. Ошондой эле үстүбүздөгү жылдын сентябрь айында Тяньцзин шаарында өтө турган ШКУга мүчө-мамлекеттердин башчыларынын саммитине даярдык көрүү маселелери талкууланды.

Өз сөзүндө Казакстандын Тышкы иштер министрлигинин башчысы Мурат Нуртлеу Уюмдун туруктуу өнүгүү жана ШКУ мейкиндигин тынчтыктын жана гүлдөп өнүгүүнүн аймагына айландыруунун кызыкчылыгы үчүн өз ара пайдалуу өнөктөштүктү түзүү потенциалына бекем ишенимин билдирди.

«ШКУ «Шанхай рухунун» принциптерине негизделген тең укуктуу кызматташтыктын уникалдуу модели бар көп тараптуу институт катары өзүнүн эл аралык беделин жана натыйжалуулугун мындан ары да бекемдей берерине ишенем», – деди Мурат Нуртлеу.

Казакстандын Тышкы иштер министри ошондой эле 2024-жылдын июль айында Астанада өткөн ШКУнун саммитинин жыйынтыгы боюнча жетишилген макулдашууларды ишке ашыруу боюнча Кытайдын системалуу мамилесин колдоорун билдирди. Ал уюмдун мындан аркы институционалдык өнүгүүсү жана ишмердүүлүгүн өркүндөтүү боюнча ырааттуу иштерди улантуунун маанилүүлүгүн белгиледи.

Сапардын алкагында ШКУга мүчө-мамлекеттердин тышкы иштер органдарынын жетекчилеринин Кытай Эл Республикасынын Төрагасы Си Цзиньпин менен жамааттык жолугушуусу болду.

Жолугушууда ишеним, теңчилик жана өз ара урматтоо духунда диалогду өнүктүрүүгө жана практикалык кызматташтыкты бекемдөөгө умтулуу баса белгиленди. Катышуучулар аймактык стабилдүүлүктү, коопсуздукту жана туруктуу өнүгүүнү камсыз кылуу кызыкчылыгында көп тараптуу өнөктөштүктү тереңдетүүгө багытталгандыгын ырасташты.

Сүрөт:Казакстан Республикасынын Тышкы иштер министрлиги