Кыргыз Республикасынын Эмгек, социалдык коргоо жана миграция министрлиги жашы жете элек жумушчулардын жайкы каникул мезгилиндеги жумуш убактысынын уруксат берилген узактыгы тууралуу эскертти.

Эмгек кодексине ылайык, 16 жашка толгон жарандар иштөөгө уруксат берилет. Айрым учурларда 15 жаштан баштап өспүрүмдөрдү ишке орноштуруу – кызматкерлердин өкүлчүлүктүү органынын же эмгек чөйрөсүндөгү ыйгарым укуктуу мамлекеттик органдын макулдугу менен мүмкүн.

Ошондой эле 14 жаштан жогорку окуучулар менен эмгек келишимин түзүүгө ата-энесинин биринин (камкорчу, көзөмөлчүсү) же камкорчулук жана көзөмөлчүлүк органынын милдеттүү түрдө жазуу жүзүндөгү макулдугу менен жол берилет. Мындай өспүрүмдөр бош убактысында гана ден соолугуна зыян келтирбеген жана окуу процессине тоскоол болбогон жеңил иштерди аткара алышат.

Кыргыз Республикасынын мыйзамдарында жумуш күнүнүн узактыгына чектөөлөр каралат:

• 14 жаштан 16 жашка чейинки өспүрүмдөр үчүн – күнүнө 5 сааттан ашык эмес;
• 16 жаштан 18 жашка чейинки өспүрүмдөр үчүн – күнүнө 7 сааттан ашык эмес.

Жашы жете элек адам жумуш менен окууну айкалыштырса, жумуш убактысынын узактыгы төмөндөйт:

• 14-16 жаш – күнүнө 2,5 сааттан ашык эмес;
• 16–18 жаш – күнүнө 3,5 сааттан ашык эмес.

Министрлик ошондой эле баса белгилейт: Кыргыз Республикасында балдар эмгегин анын эң начар формаларында пайдаланууга катуу тыюу салынат. Жашы жете электерди жумушка алууда иш берүүчүлөр эмгек мыйзамдарынын бардык талаптарын сактоого милдеттүү.