22-23-май күндөрү Түркиянын Үй-бүлө жана социалдык иштер министрлиги тарабынан Түркиянын Президенти Режеп Тайып Эрдоган тарабынан «Үй-бүлө жылы» деп жарыяланган 2025-жылдын алкагында үй-бүлө институтун чыңдоо боюнча эл аралык форум болуп өттү.

Форумдун жабылыш аземине Түркия Республикасынын президенти Режеп Тайып Эрдоган жана биринчи айым Эмине Эрдоган катышты.

Жыйынтыктоочу сөзүндө алар коомдун жана мамлекеттүүлүктүн негизи катары үй-бүлөнүн негизги ролун баса белгилеп, бул жаатта эл аралык кызматташууну колдоорун билдиришти. Форумдун катышуучулары үй-бүлө институтун бекемдей турган алдыңкы дүйнөлүк тажрыйбаны ишке ашырууга багытталган биргелешкен стратегияларды жана сунуштарды иштеп чыгуу зарылдыгын талкуулашты.

Кыргызстан үй-бүлөлүк баалуулуктарды сактоого жана өнүктүрүүгө багытталган демилгелерди колдоо менен эл аралык коомчулук менен тилектештигин билдирди.

Форумга Кыргыз Республикасынан Эмгек, социалдык коргоо жана миграция министри Равшанбек Сабиров катышты.

Ал өз сөзүндө үй-бүлөгө карата социалдык саясат маселелери боюнча Кыргызстандын позициясын айтып, өлкөлөр ортосунда тажрыйба алмашуунун маанилүүлүгүн белгиледи.

"Кыргызстан үй-бүлө институтун бекемдөөгө багытталган демилгелерди ырааттуу түрдө колдоп келет. Салттуу үй-бүлөлүк баалуулуктарды сактоо – туруктуу жана дени сак коомдун негизи деп эсептейбиз. Ийгиликтүү тажрыйба менен бөлүшүү гана эмес, заманбап чакырыктарды чечүүнүн жолдорун биргелешип иштеп чыгуу маанилүү", – деп белгиледи Сабиров.

Ал ошондой эле үй-бүлө, гендер жана балдардын укуктарын коргоо боюнча позициясын айтып, Кыргызстан көптөгөн эл аралык милдеттенмелердин катышуучусу экенин жана бир катар тиешелүү келишимдерди ратификациялаганын баса белгиледи.

Форумга 26 өлкөнүн тиешелүү ведомстволорунун өкүлдөрү жана министрлер катышты. Иш-чаранын жыйынтыгында үй-бүлөнү коргоо жана салттуу баалуулуктарды жайылтуу жаатында эл аралык кызматташтыкты кеңейтүүгө багытталган негизги декларацияларга кол коюлду.