Нью-Йорк шаарында өтүп жаткан БУУнун Башкы Ассамблеясынын 80-сессиясынын алкагында Кыргызстандын тышкы иштер министри Жээнбек Кулубаев Гананын тышкы иштер жана аймактык интеграция министри Самуэл Окудзето Аблаква менен жолугушту. Бул тууралуу Кыргызстандын Тышкы иштер министрлигинин басма сөз кызматы билдирди.

Сүйлөшүүлөрдүн жүрүшүндө министр Ж.Кулубаев бул жолугушуу Кыргыз Республикасы менен Гана Республикасынын ортосундагы эки тараптуу мамилелерди чыңдоодо жана мындан ары өнүктүрүүдө маанилүү кадам болоруна ишеним билдирди.

Мындан тышкары, кызматташтыктын актуалдуу маселелери, анын ичинде саясий диалогду тереңдетүү, соода-экономикалык жана маданий-гуманитардык кызматташтыкты кеңейтүү, БУУнун жана башка эл аралык уюмдардын алкагында өнөктөштүктү бекемдөө маселелери талкууланды.

Жолугушуунун жыйынтыгында тараптар кызматташтыкты арттыруу максатында тышкы саясат ведомстволорунун ортосунда үзгүлтүксүз байланыштарды улантууну макулдашышты.

Министр Ж.Кулубаев кесиптешин каалаган убакта Кыргызстанга келип кетүүгө чакырды.