Кыргыз Республикасынын Тышкы иштер министрлигинин Консулдук департаментинин директору Сейтек Жумакадыр уулу менен Иран Ислам Республикасынын Кыргызстандагы элчиси Голам Хоссейн Ядегари менен жолугушуу болуп өттү. Бул тууралуу Тышкы иштер министрлигинин басма сөз кызматы билдирди.

Жолугушуунун жүрүшүндө тараптар консулдук чөйрөдөгү эки тараптуу кызматташуунун актуалдуу маселелерин кеңири талкуулашты.

Эки өлкөнүн аймагында жайгашкан Кыргыз Республикасынын жана Иран Ислам Республикасынын жарандарынын укуктарын жана мыйзамдуу кызыкчылыктарын коргоону камсыздоо боюнча биргелешкен чараларга өзгөчө көңүл бурулду.

Ошондой эле мамлекеттик кызмат көрсөтүүлөрдүн натыйжалуулугун жана жеткиликтүүлүгүн жогорулатууга багытталган консулдук жана миграциялык процедураларды жөнөкөйлөштүрүүнүн мүмкүн болгон жолдору талкууланды.

Эки тарап тең өз ара кызыкчылык туудурган маселелер боюнча кызматташууну мындан ары чыңдоо максатында тиешелүү органдардын активдүү жана конструктивдүү өз ара аракеттенүүсүнүн маанилүүлүгүн баса белгилешти.