Бүгүн Кыргызстандын тышкы иштер министри Жээнбек Кулубаев менен Түркмөнстандын министрлер кабинетинин төрагасынын орун басары, тышкы иштер министри Рашид Мередовдун ортосунда телефондук сүйлөшүү болду.

Сүйлөшүүнүн жүрүшүндө тараптар көп тараптуу кызматташтыктын актуалдуу маселелерин талкуулашты жана эки тарапты кызыктырган аймактык жана эл аралык күн тартибиндеги маселелер боюнча пикир алышты.

Атап айтканда, 2025-жылдын 5-8-августунда Түркмөнстандын Аваза шаарында өтө турган Деңизге чыгууга мүмкүнчүлүгү жок өнүгүп келе жаткан өлкөлөрдүн (LLDC) алдыдагы Үчүнчү Конференциясына даярдык көрүү маселелери, анын ичинде Кыргыз Республикасынын делегациясынын пландаштырылган катышуусу талкууланды.

Тараптар бул эл аралык иш-чараны ийгиликтүү өткөрүүнүн маанилүүлүгүн белгилешип, анын ЖЧК өлкөлөрүнүн кызыкчылыктарын алдыга жылдыруу, аймактык кызматташтыкты чыңдоо жана туруктуу өнүгүүгө көмөк көрсөтүү үчүн маанисин белгилешти.

Сүйлөшүүнүн соңунда министрлер кыргыз-түркмөн кызматташтыгын эки тараптуу жана эл аралык уюмдардын алкагында мындан ары тереңдетүүгө даяр экендиктерин ырасташты.