8-июлда Кыргыз Республикасынын Президенти Садыр Жапаров менен Тажикстан Республикасынын Президенти Эмомали Рахмон Дүйшөмбү шаарындагы эки өлкөнүн продукцияларынын улуттук көргөзмөсүнө барышты.

Мамлекет башчылары эки өлкөнүн өнөр жайынын түрдүү тармактарындагы жетишкендиктерди көрсөткөн экспонаттарды көрүштү.

Кыргызстандын экспозициясында жеңил жана тамак-аш өнөр жайы, автомобиль өнөр жайы (анын ичинде жеңил унааларды, кичи жана чоң жүк ташуучу унааларды чыгаруу), айыл чарба жана кайра иштетүү сыяктуу тармактардагы өлкөнүн потенциалын көрсөткөн ата мекендик товарлардын жана технологиялардын кеңири спектри коюлду.

Көргөзмө кыргыз бизнесинин мүмкүнчүлүктөрүн көрсөтүү, ошондой эле эки өлкөнүн бизнес коомчулугунун ортосунда жаңы өнөктөштүк мамилелерди түзүү жана тажрыйба алмашуу аянтчасы болуп калды.