2025-жылдын 7-июлунда Кыргыз Республикасынын Экономика жана соода министрлигине караштуу Өзбекстан Республикасындагы Кыргыз Республикасынын Соода өкүлчүлүгүнүн колдоосу менен «Ош Nonwoven Materials Factory» ЖЧКсы (Кыргызстан) жана «Эко Пром Энерго» ЖЧКсы (Өзбекстан) ортосунда кызматташуу жөнүндө меморандумга кол коюлду. Меморандумдун максаты – Кыргызстанда биргелешкен кыргыз-өзбек ишканасын түзүү, өлкөнүн өнөр жай потенциалын кеңейтүү, импортту алмаштыруу саясатын ишке ашыруу, заманбап технологияларды киргизүү жана эки тараптуу өнөр жай кызматташтыгын бекемдөө.Биринчи этапта тараптар төмөнкү жогорку технологиялык жабдууларды жеткирүү жана орнотуу боюнча биргелешкен ишкана түзүүнү пландаштырууда:

• көмүр, термикалык мунай жана газ менен иштеген суу жана буу казандары,
• трансформатордук көмөкчордондор,
• суюлтулган мунай газын (LPG) сактоо үчүн резервуарлар;
• тазалоочу жайлар.

Экинчи этапта өнөктөштөр рынокко талдоо жүргүзүп, Кыргызстанда жогоруда аталган жабдууларды жана инфраструктуралык чечимдерди локалдаштыруу боюнча иш-чараларды этап менен ишке ашырышат. Бул жергиликтүү өндүрүштүн үлүшүн көбөйтүүгө, инвестиция тартууга жана жаңы жумуш орундарын түзүүгө мүмкүндүк берет. Меморандумга кол коюу Кыргызстан менен Өзбекстандын ортосундагы өнөр жай кызматташтыгын бекемдөөдөгү олуттуу кадамдардын бири болду. Документ эки өлкөнүн жеке секторлорунун индустриялаштыруу жана экономиканы туруктуу өнүктүрүү жаатындагы стратегиялык максаттарды биргелешип ишке ашырууга даярдыгын көрсөтөт.