Жогорку Кеңештин Бюджет, экономикалык жана фискалдык саясат боюнча комитети өзгөчө укуктук режимге жана статуска ээ “Тамчы” атайын финансылык инвестиция аймагын түзүүгө багытталган мыйзам долбоорлорунун пакетин карап, үч окууда жактырды.

Атап айтканда, комитет төмөнкүлөрдү колдоду:

• “Өзгөчө укуктук режими жана статусу бар “Тамчы” атайын финансылык инвестиция аймагы жөнүндө” мыйзамдын долбоору;
• “Тамчы илимий-техникалык институтунун маселелери боюнча айрым мыйзам актыларына өзгөртүүлөрдү киргизүү жөнүндө” мыйзамдын долбоору;
• “Кыргыз Республикасынын Улуттук банкы жөнүндө” жана “Кыргыз Республикасынын Эсеп палатасы жөнүндө” конституциялык мыйзамдарга өзгөртүүлөрдү киргизүү тууралуу” конституциялык мыйзамдын долбоору.

Мыйзам долбоорлорунун демилгечиси министрлер кабинетинин төрагасы болуп, аларды экономика жана коммерция министри Бакыт Сыдыков тааныштырды.

«Тамчы» ФЧКны түзүүнүн максаты инвестиция тартуу, өндүрүштү, туризмди, курорттук тармакты жана транспорттук инфраструктураны өнүктүрүү болуп саналат. Мыйзам долбоорлору аймакты түзүүнүн жана башкаруунун укуктук негизин түзөт, статусун, иштин тартибин, ошондой эле анын аймагындагы чарбалык ишти жөнгө салуунун өзгөчөлүктөрүн аныктайт.

Талкууда депутат Камила Талиева “Тамчы” менен эркин экономикалык аймактардын (ЭЭА) айырмачылыктары, жаңы аймактын укуктук режиминин жана түзүмүнүн чоо-жайын көтөрдү. Депутат Эрнис Айдаралиев Тамчынын иштөө механизмдери боюнча тактоочу суроолорду берди.