Кыргыз Республикасынын Билим берүү министрлигинде Билим берүү министринин орун басары Альберт Махметкулов Кёнсангбук-до провинциясынын (Корея Республикасы) расмий делегациясы менен жолугушту.

Жумушчу жолугушуунун жүрүшүндө тараптар билим берүү жана маданий байланыштарды чыңдоо жаатында кызматташуунун келечегин талкуулашты. Кыргызстандын жалпы билим берүүчү мектептерине корей тилин киргизүү, Кыргызстандагы ЖОЖдор менен Кёнсанбук-до провинциясынын ортосундагы академиялык алмашууну өнүктүрүү, кесиптик жогорку окуу жайларында корей тили кафедрасын түзүү, ошондой эле жаштар арасында достукту жана өз ара түшүнүшүүнү чыңдоо максатында мектеп алмашууга колдоо көрсөтүү негизги темалар болду.

Министрдин орун басары өлкө жаштарынын арасында корей тилине болгон кызыгуу күчөп жатканын белгилеп, билим берүү тармагындагы кызматташуу аны үйрөнүүгө жагымдуу шарттарды түзүп жатканын баса белгиледи.

Тараптар кызматташтыкты мындан ары өнүктүрүүнүн маанилүүлүгүн белгилешип, макулдашылган демилгелерди ишке ашыруу боюнча биргелешкен ишти улантууга макулдашышты. Жолугушуу бирдиктүү билим берүү мейкиндигин түзүүгө жана маданияттар аралык байланыштарды чыңдоого багытталган Кыргызстан менен Кёнсанбук-до провинциясынын стратегиялык өнөктөштүгүн өнүктүрүүдөгү дагы бир кадам болду.