Кыргызстан Дүйнөлүк көчмөндөр оюндарын өткөрөт, бул жогорку деңгээлдеги эл аралык иш-чара, ага кеминде 100 өлкөдөн спортчулар жана коноктор катышат.

Бул тууралуу Ысык-Көл облусунун Чолпон-Ата шаарындагы ипподромдо өткөн 2026-жылдагы оюндарга даярдык көрүү боюнча көчмө жыйында КР Министрлер Кабинетинин төрагасынын орун басары, суу чарбасы, айыл чарбасы жана кайра иштетүү өнөр жайы министри Бакыт Төрөбаев билдирди.

Жыйында ири масштабдуу маданий жана спорттук иш-чарага даярдык көрүү, уюштуруу иштеринин жүрүшү, инфраструктуралык объектилердин абалы жана эл аралык конокторду кабыл алуу шарттары талкууланды.

Маданий мелдештердин байге фонду болжол менен 4 миллион сомду түзөт деп кабарланууда. Программада бардык негизги улуттук спорт түрлөрү жана ат оюндары көрсөтүлөт. Оюндар кыргыз элинин көчмөн маданиятын, каада-салттарын жана тарыхый мурасын эл аралык коомчулукка кеңири тааныштырууну максат кылат.

Бакыт Төрөбаев жумушчу сапарынын алкагында Чолпон-Ата шаарындагы ипподромдун учурдагы абалын көрүп чыгып, даярдыктарды күчөтүү, инфраструктураны жакшыртуу жана эл аралык стандарттарга ылайык шарттарды түзүү боюнча конкреттүү тапшырмаларды берди. Мамлекеттик жана жергиликтүү бийлик органдарына белгиленген мөөнөттө жогорку сапаттагы даярдыктарды камсыз кылуу милдети жүктөлдү.

Эске сала кетсек, 2026-жылдагы Дүйнөлүк көчмөндөр оюндары 31-августтан 6-сентябрга чейин Кыргызстанда өтөт. Иш-чара өлкөнүн туристтик потенциалын жогорулатууга, улуттук маданиятты жайылтууга жана эл аралык кызматташтыкты кеңейтүүгө багытталган.

07.02.2026 08:05:20