Министрлер Кабинетинин Төрагасы – Кыргыз Республикасынын Президентинин Аппаратынын Жетекчиси Акылбек Жапаров Ош шаарына иш сапары менен келип, шаардагы селдин кесепеттерин жоюу иштери менен таанышты.

Ош шаарында селдин кесепеттерин жоюуга 530 жарандык коргонуу адистери, ошондой эле 30дан ашык атайын техника тартылган.

Министрлер кабинетинин башчысы Ош шаарында жана Ош облусунда өзгөчө кырдаалдын кесепеттерин жоюу боюнча штабдын жыйынын өткөрдү. Аткарылып жаткан иштер боюнча КР ӨКМнин жетекчилиги маалымат берди. Кошумчалай кетсек, президенттин Ош облусундагы ыйгарым укуктуу өкүлү жана шаардык мэрия бул ишке активдүү катышууда.

Мындан тышкары, Акылбек Жапаров соода тармагынын өкүлдөрү менен жеке жолугушуу өткөрүп, курч суроолорго жооп берди.

«Акыркы айларда биз, тилекке каршы, адамдардын өлүмүнө жана жаш балдардын кайгылуу өлүмүнө алып келген табигый кырсыктарга кабылдык. Адам өмүрүнөн кымбат эч нерсе жок. Президенттин жана Министрлер Кабинетинин атынан каза болгондордун жакындарына көңүл айтабыз. Бүгүн селден жабыркаган объектилерди карап чыктым. Базарда иштеген соодагерлерге тиешелүү комиссия түзүп, келтирилген зыянды иликтөө зарыл. Ишкерлерди колдоонун механизмдерин иштеп чыгуу зарыл”, – деп белгиледи А.Жапаров.

Министрлер кабинетинин башчысы жер-жерлерде аткарылган иштердин начардыгын белгиледи. ӨКМдин буйругу менен аталган маселе боюнча текшерүү жүргүзүү тапшырмасы берилди. «Коопсуздук чараларын максималдуу түрдө күчөтүп, калкты табигый кырсыктардан коргоо зарыл. Акыркы окуялардан чоң сабак алуу керек. Жергиликтүү бийлик дарыяларга жакын жайгашкан жана сел кооптуу аймактарда жайгашкан эс алуучу жайларды иретке келтирүү маселесин тартипке келтирүүсү зарыл”, – дейт Акылбек Жапаров.

Сүрөт: Кыргыз Республикасынын Министрлер Кабинети