2024-жылдын 14-июлунда Кыргыз Республикасынын Президенти Садыр Жапаров АКШнын мурдагы президенти Дональд Трамптын өмүрүнө кол салуу аракетине байланыштуу билдирүү жасады.
«Мен Америка Кошмо Штаттарынын президенттигине талапкер жана өлкөнүн мурдагы президенти Дональд Трамптын Пенсильваниядагы шайлоо митинги учурунда жасалган кол салуу аракетин кескин айыптайм. Анын тезирээк сакайып кетишин, ошондой эле бардык жабыркагандардын тез сакайып кетишин каалайм», – деп айтылат расмий билдирүүдө.
2024-жылдын 13-июлунда, Пенсильвания штатынын Батлер шаарында шайлоо өнөктүгү учурундагы митингде мурдагы мамлекет башчысы жана АКШ президенттигине талапкер Дональд Трамптын өмүрүнө кол салуу аракети жасалган.
Бул 1981-жылдан бери (Роналд Рейган) биринчи жолу АКШнын мурдагы же иштеп жаткан президентине кол салуу аракетинен жарадар болгон жана 1972-жылы Жорж Уоллеске кол салуу аракетинен кийин биринчи жолу президенттикке талапкерге ок тийген.
Сүрөт: КР президентинин басма сөз кызматы