2025-жылдын 28-июлунда Кыргызстандын Улуттук банк Башкармасы эсептик ченди (негизги чен) 25 базистик пунктка, 9,25 пайызга чейин жогорулатуу чечимин кабыл алган. Чечим 2025-жылдын 29-июлунан тартып күчүнө кирет.

Регулятордун айтымында, Кыргызстанда инфляция орточо чегинде калууда. 2025-жылдын башынан бери инфляциянын деңгээли 4,6 пайызды, жылдык мааниде 8,7 пайызды түздү. Баалардын учурдагы динамикасы убактылуу жана сезондук факторлорго, анын ичинде өткөн жылдын тийиштүү мезгилиндеги төмөнкү статистикалык базанын таасирине байланыштуу.

Инфляция түзүмүндө баанын эң көп өсүшү сезондук жана убактылуу факторлордун таасиринен, ошондой эле Кыргыз Республикасынын соода боюнча өнөктөш өлкөлөрүндө инфляциянын салыштырмалуу жогорку фонунда азык-түлүк тобунда байкалган. Инфляциянын азык-түлүктөн башка бөлүгүндө тарифтерди пландаштырылган жогорулатуунун алкагында электр энергиясына бааларды корректировкалоо негизги салым кошкон.

Кыргыз Республикасындагы экономикалык шарттар олуттуу өзгөргөн жок. Өлкөдө жогорку экономикалык жигердүүлүк сакталууда, ал эми ички суроо-талап үй чарбаларынын кирешелеринин өсүшү шартында кеңейүүнү улантууда. Ошондой эле жеке каржылоо аркылуу да, фискалдык канал аркылуу да негизги капиталга инвестициялардын көбөйүшү байкалууда. 2025-жылдын январь-июнунда ИДПнын реалдуу өсүшү 11,7 пайызды түздү (2024-жылдын ушул мезгилине салыштырмалуу), бул негизинен кызмат көрсөтүү, курулуш жана өнөр жай секторлорунун өсүшү менен шартталган.

Монетардык шарттар орто мөөнөттүү келечекте 5-7 пайыздык белгиленген максаттуу индикатордун чегинде Кыргыз Республикасында баалардын туруктуулугун камсыз кылууга багытталган. Кабыл алынган акча-кредит саясатынын чаралары банктар аралык акча рыногунда туруктуулукту сактоого мүмкүндүк берет. Жалпысынан өлкөнүн банк системасы улуттук валютадагы ликвиддүүлүктүн жогорку көлөмүн кармап турат, мындай шарттарда Улуттук банк экономикадагы акча массасынын тең салмактуу деңгээлин камсыз кылуу үчүн акча-кредит операцияларын жүргүзөт.

Валюта рыногунда кырдаал туруктуу, мында валютага карата суроо-талаптын жана сунуштун тең салмактуулугунун рыноктук түзүлүшү шартында алмашуу курсу ийкемдүү бойдон калууда.

Быйылкы жылы тышкы экономикалык чөйрөдөгү белгисиздик даражасы геосаясий факторлордун жогорулашынын жана дүйнөлүк соода саясатынын өзгөрүшүнүн фонунда олуттуу жогорулады, бул тышкы инфляциялык факторлорду жана дүйнөлүк азык-түлүк жана чийки зат рынокторунда баалардын туруксуздугун шарттайт. Аймактык контекстте соода өнөктөш өлкөлөрдө салыштырмалуу жогорку инфляция сакталып калууда. Мындай шарттарда, кыска жана орто мөөнөттүү келечекте инфляциянын факторлорун талдоону эске алуу менен, ошондой эле Улуттук банктын акча-кредит саясаты келечекке багытталгандыгын эске алуу менен, орто мөөнөттүү келечекте өлкөдө баалардын туруктуулугун колдоо максатында бүгүнкү күндө негизги ченди 25 базистик пунктка 9,25 пайызга чейин жогорулатуу максатка ылайыктуу көрүнөт.

Улуттук банк акча-кредит саясатын жүргүзүүдө тең салмактуу мамилени карманат жана инфляциянын пайда болгон тышкы жана ички факторлоруна баа берүүнү улантат. Баалардын туруктуулугуна кандайдыр бир тобокелдиктер пайда болгон учурда Улуттук банк акча-кредит саясатына корректировкаларды киргизүү мүмкүнчүлүгүн жокко чыгарбайт.

Улуттук банк Башкармасынын негизги чен маселеси боюнча кезектеги пландалган отуруму 2025-жылдын 25-августунда өткөрүлөт.