МОСКВА, 2026-жылдын 20-февралы – Karavan Info маалымат агенттиги. Россиянын президенти Владимир Путин менен Мадагаскардын лидери Микаэль Рандрианирина Москвада сүйлөшүүлөрдү жүргүзүштү. Кремлде өткөн жолугушуу эки жарым сааттан ашык убакытка созулуп, делегациялардын катышуусу менен улантылгандан кийин жекеме-жеке талкууланды.

Сүйлөшүүлөрдүн жүрүшүндө Путин Мадагаскарды Орусиянын Африкадагы негизги өнөктөштөрүнүн бири деп атап, өлкөлөрдүн ортосундагы көп жылдык байланыштарды белгиледи. Ал энергетика, геологиялык чалгындоо, айыл чарба жана гуманитардык иштер жаатындагы кызматташуунун потенциалын баса белгиледи.

Мадагаскардын президенти аны кабыл алгандыгы үчүн ыраазычылык билдирип, инфраструктура жана аскердик маселелерди кошо алганда, кызматташууну жаңы деңгээлге көтөрүүгө даяр экенин билдирди. Рандрианирина ошондой эле орус лидеринен арал мамлекетин каптаган кыйратуучу циклондордун кесепеттерин жоюуга жардам сурады. Путин кырсыкка байланыштуу көңүл айтып, Орусия зарыл болгон жардамды көрсөтөөрүнө ишендирди.

Бул Микаэль Рандрианиринанын Орусияга биринчи сапары. Кийинки жылы өлкөлөр дипломатиялык мамилелердин 55 жылдыгын белгилешет.

Сүрөт: Kremlin.ru