Монголиянын Президенти Ухнаагийн Хурэлсух бүгүн, 20-июлда Кыргыз Республикасына мамлекеттик сапар менен келди.

“Манас” эл аралык аэропортунан Монголиянын лидерин Кыргыз Республикасынын Президенти Садыр Жапаров тосуп алды. Флагштокторго эки өлкөнүн желектери илинип, килем төшөлүп, улуттук боз үй түрүндөгү инсталляция орнотулуп, ардактуу кароол тизилди.

Улуттук кийимчен кыздар Ухнаагийн Хурелсухту куттукташып, ага гүл, боорсок жана бал тартуулашты.

Мамлекет башчылары үчүн концерттик программа уюштурулуп, анда кыргыз өнөрпоздорунун катышуусунда кыргыз жана монгол музыкалык чыгармаларын аткарып беришти.

Сыйлыктуу мейманды да кыргыз элинин бай маданий мурасын чагылдырган улуттук каада-салт менен тосуп алышты.