Кыргызстанда темир жол жана туризм тармагы үчүн маанилүү окуя болуп өттү – немис туристтик компаниялардын 50дөн ашык өкүлдөрү Бишкек-Балыкчы багыты боюнча поезд менен таанышуу сапарына чыгышты. Бул тууралуу «НК Кыргыз темир жолу» мамлекеттик ишканасы билдирди.

Люкс вагондордогу саякат Кыргызстанды чет элдик туристтер үчүн жагымдуу жер катары таанытуу алкагында уюштурулган. Демилге Туризмди өнүктүрүүнү колдоо фонду, Туризм департаменти жана «Кыргыз темир жолу» ишканасынын колдоосу менен ишке ашты.

Германиядан келген коноктор Ысык-Көл облусунун кооз пейзаждарын көрүп, маданий жана тарыхый жерлери менен тааныша алышты. Бир күн мурда делегация Бишкекке да келип, борбордун туристтик мүмкүнчүлүктөрү менен таанышкан.

Долбоор кирүүчү туризмди өнүктүрүүгө, Кыргызстандын эл аралык аренада таанылышын жогорулатууга жана меймандос жана коопсуз өлкө катары имиджин бекемдөөгө багытталган.

«Кыргыз темир жолу» туризм инфраструктурасын жигердүү өнүктүрүүдө, өлкө боюнча ыңгайлуу жана арзан темир жол каттамдарынын жаңы форматтарын киргизүүдө.