2025-жылдын 12-13-майында Исламабад шаарында өтүүчү Соода-экономикалык жана илимий-техникалык кызматташтык боюнча кыргыз-пакистан өкмөттөр аралык комиссиясынын бешинчи отурумуна даярдык көрүү алкагында Пакистандагы элчиси Авазбек Атаханов Пакистандын темир жолдорунун федералдык министри Мухаммад Ханиф Аббаси менен жолугушту.

Жолугушууда тараптар темир жол тармагындагы эки тараптуу кызматташуунун учурдагы абалын жана келечегин талкуулашты. Кыргызстан менен Пакистандын транспорт, логистика, санариптештирүү, темир жол тармагы жана туризм тармактарындагы байланыштарды кеңейтүүгө өбөлгө түзгөн бул жааттагы практикалык кызматташтыгынын жогорку мааниси белгиленди.

Элчи А.Атаханов Кытай-Кыргызстан-Өзбекстан темир жол линиясынын курулушу тууралуу маалымат берди, ал “Бир алкак – бир жол” демилгесинин маанилүү элементи болуп калат жана аймактык жана аймактар аралык транспорттук байланышты арттырууга салым кошот.

Өз кезегинде министр М.Х. Аббаси кыргыз тарапты Борбор Азия өлкөлөрүнө Пакистандын деңиз портторуна, анын ичинде Карачи портуна чыгуу мүмкүнчүлүгүн камсыз кылган Өзбекстан-Ооганстан-Пакистан темир жол долбооруна катышуу мүмкүнчүлүгүн карап чыгууга чакырды.

Жолугушуунун жыйынтыгында темир жол куруу жана эксплуатациялоо жаатында кызматташууну активдештирүү, биргелешкен долбоорлорду ишке ашыруу, жумушчу топ түзүү, эксперттик жана министрлер деңгээлинде өз ара сапарларды уюштуруу боюнча макулдашууга жетишилди.

Соңунда Элчи А.Атаханов эки тараптуу кызматташтыкты мындан ары өнүктүрүү маселелерин талкуулоо үчүн Пакистандын Федералдык темир жолдор министри башында турган делегацияны Кыргыз Республикасына таанышуу сапары менен келүүгө чакырды.