Бүгүн, 1-сентябрда Кыргыз Республикасынын Президенти Садыр Жапаров Кыргызстан элин Билим күнү менен куттуктады.

Мамлекет башчынын куттуктоосу:

«Урматтуу мугалимдер!

Урматтуу мектеп окуучулары жана студенттер!

Урматтуу ата-энелер!

Баарыңыздарды жаңы окуу жылынын башталышы жана Билим күнү менен чын дилимден куттуктайм!

Билим күнү – жаркын келечек үчүн терең билим алууга чакырган маанилүү майрам!

Заман өзгөрөт, бирок билимдин мааниси эч качан маанисин жоготпойт. Ал эми 21-кылымда негизги багыт жана кыймылдаткыч күч билим берүү системасы бойдон калууда. Билим берүү өнүккөн өлкөлөрдө гана саясий, маданий, экономикалык жана башка кайра жаралуулар болоору айдан ачык.

Биз билим берүү системасы мамлекеттин узак мөөнөттүү өнүгүүсүнүн пайдубалы экенин, ал эми билимге жумшалган инвестиция өлкөнүн келечегине эң маанилүү салым экенин жакшы түшүнөбүз.

Бүгүнкү күндө биздин негизги максатыбыз сандан сапатка өтүп, ар бир окуучуга терең жана ар тараптуу билим берүү. Бул үчүн мамлекет мугалимдердин эмгек шарттарын жакшыртууга, алардын эмгек акысын жогорулатууга багытталган демилгелерди ырааттуу колдоого алып, ошондой эле заманбап билим берүү инфраструктурасын өнүктүрүү, санариптик технологияларды киргизүү жана педагогикалык кадрлардын кесиптик чеберчилигин жогорулатуу боюнча чараларды көрүүдө.

Санариптик технологиялардын, жасалма интеллекттин жана биотехнологиянын тез өнүгүп жаткан доорунда биз сапаттуу билим берүүнү негиз катары кабыл алып, билим берүү системабызды эл аралык билим берүү мейкиндигине интеграциялоо үчүн иштеп жатабыз. Окутуунун методикасын жаңылоо, атаандаштыкка жөндөмдүү адистерди даярдоо жана бул үчүн бардык зарыл шарттарды түзүү мамлекеттик саясаттын артыкчылыктуу багыттарынын бири болуп калды.

Кыргыз элинде Алтын казык жылдызы эзелтен багыттын, жолдун көрсөткүчү катары кабыл алынган. Демек, билим берүү тармагындагы “Алтын казык” программасы заман агымы менен жылып, жаңыча ой жүгүртүүнү калыптандырып, жаңы жашоого жол ачкан заманбап билим берүүнүн символу.

“Алтын казык” программасын жаңы доордун шартында чырак катары пайдаланып, ар бир окуучуга терең билим берүү – агартуучулардын бүгүнкү миссиясы. “Алтын Казык” мугалимдерибиз үчүн методикалык, адеп-ахлактык, маданий жол көрсөтүүчү, окуучулар үчүн келечекке жол көрсөткөн күч, коомдун жалпы өнүгүүсүнүн компасы болоруна терең ишенем.

Урматтуу мекендештер!

Ар бир мугалим балдардын келечегин түзгөн улуу инсан. Ошондуктан мугалимдер коомубуздун негизги күчү! Алардын кесипкөйлүгү, жаратман эмгеги менен гана биз билим берүү тармагын заман талабына ылайык өнүктүрө алабыз. Бүгүнкү күндө мугалимдердин ролу дагы да чоң болуп, ошону менен бирге алардын жоопкерчилиги да жогорулаганын баса белгилегим келет. Мугалимдерибиздин жан аябас эмгеги, түгөнгүс энергиясы үчүн терең ыраазычылык билдирем.

Урматтуу мугалимдер, урматтуу окуучулар, студенттер жана ата-энелер!

Сиздерди дагы бир жолу Билим күнү менен куттуктайм!

Жаңы окуу жылына жаңы дем, жаңы күч, жаңы максаттар менен киришиңиздерди каалайм.

Баарына чың ден соолук, чыгармачылык ийгиликтерди жана конструктивдүү ийгиликтерди каалайм!”

Булак: caravan-info.uz

01.09.2025 06:32:26