ООГАНСТАН, 2026-жылдын 28-февралы – Karavan Info маалымат агенттиги. Талибандын тышкы иштер министри Амир Хан Муттаки жана Сауд Арабиясынын тышкы иштер министри ханзаада Фейсал бин Фархан Аль Сауд Ооганстан менен Пакистандын ортосундагы учурдагы жаңжалды талкуулап, дипломатиялык жол менен чечүүнүн маанилүүлүгүн баса белгилешти.

Талибандын Тышкы иштер министрлигинин билдирүүсүнө ылайык, эки тарап Ооганстан менен Пакистандын ортосундагы мамилелердеги акыркы кырдаал боюнча телефон аркылуу кеңири сүйлөшүүлөрдү жүргүзүштү.

Маектешүү учурунда Муттаки Сауд Арабиясына конструктивдүү дипломатиялык аракеттери жана аймактык туруктуулукту камсыз кылуудагы активдүү ролу үчүн ыраазычылык билдирди. Ал Ооганстан бардык өлкөлөр менен өз ара урматтоого негизделген оң мамилелерди түзүүгө умтулаарын белгиледи. Анын айтымында,

"Ооганстан эч кимге карата эч кандай терс ниети жок жана коопсуздук чараларын өзүнүн коопсуздугунун алкагында гана жөнгө салат. Акыркы коопсуздук чаралары коргонуу, реактивдүү мүнөздө болуп, кырдаалды ооздуктоого багытталган."

Өз кезегинде, ханзаада Фейсал бин Фархан аймактагы чыңалууну азайтуу үчүн дипломатиялык чечимдин маанилүүлүгүн белгилеп, бардык тараптар өз ара сыйлоо, эгемендүүлүк жана аймактык бүтүндүк принциптерине берилген бойдон калышы керектигин кошумчалады. Ошондой эле ал Ооганстандын пикир келишпестиктерди чечүү үчүн диалог жана саясий механизмдердин зарылдыгы жөнүндөгү позициясын кубаттап, Эр-Рияд аймактык туруктуулукту камсыз кылуу боюнча аракеттерин уланта берерине ишендирди.

Сүрөт: AFG – Эл аралык