Кытай Эл Республикасынын Төрагасы Си Цзиньпин Кыргыз Республикасынын Президенти Садыр Жапаровду жана Кыргызстан элин Эгемендүүлүк күнү менен куттуктады.

"Сиздин жетекчилигиңиз менен Кыргызстан улуттук өнүгүүдө тынымсыз жаңы жана кубандырарлык ийгиликтерге жетишип келе жатат. Жакында жаңы Кыргызстанды куруу планын түзгөн Кыргыз Республикасын 2030-жылга чейин өнүктүрүүнүн Улуттук программасы бекитилди. Жаңы доордо достук кошуна жана ар тараптуу стратегиялык өнөктөш катары Кытай тарап буга чын жүрөктөн кубанычта.

Ушул жылдын башынан бери биз сиздер менен эки жолу жолугушууну ийгиликтүү өткөрүп, Кытай менен Кыргызстандын ортосундагы ар тараптуу кызматташуу боюнча маанилүү консенсуска жетиштик жана кытай-кыргыз мамилелерин өнүктүрүүнүн жаңы планын белгиледик.

Кытай тарап кыргыз тарап менен саясий өз ара ишенимди ырааттуу тереңдетүү, бири-бирине бекем колдоо көрсөтүү жана Кытай менен Кыргызстандын жалпы тагдырынын шериктештигин түзүү максатында «Бир алкак, бир жол» курулушун сапаттуу биргелешип ишке ашыруу үчүн кызматташууга даяр.

«Кыргызстандын гүлдөп өсүшүн, ал эми анын элине бакыт жана бакубатчылык каалайм», – деп айтылат куттуктоо телеграммасында.