БИШКЕК, 2026-жылдын 16-марты – Karavan Info маалымат агенттиги. 24-26-март күндөрү Түркиянын Стамбул шаарындагы Atlas кинотеатрында кыргыз киносунун күндөрү өтөт.
Иш-чара түрк коомчулугун заманбап кыргыз киносу менен тааныштыруу, маданий байланыштарды өнүктүрүү жана улуттук тасмаларды эл аралык аренага чыгаруу максатында уюштурулду.
Иш-чарада белгилүү кыргыз режиссерлорунун үч көркөм тасмасы көрсөтүлөт: Актан Арым Кубаттын "Кара Кызыл Сары", Дастан Жапар уулунун "Качкын" жана Руслан Акундун "Энелердин таманынын астындагы бейиш 2".
Тасмалар көрүүчүлөрдү кыргыз коомунун жашоосу, улуттук каада-салттары, баатырлардын тагдыры жана учурдагы социалдык маселелер менен тааныштырат.
Кыргыз киносунун күндөрү эки өлкөнүн ортосундагы гуманитардык кызматташтыкты өнүктүрүүгө жана кыргыз маданиятын чет өлкөлөрдө жайылтууга багытталган.
Сүрөт: Кыргызстандын Маданият министрлиги