Таиланд Королдугунун Тышкы иштер министрлигинин расмий билдирүүсүнө ылайык, Таиланд 2025-жылдын 1-майынан тартып, Таиландга чет өлкөлүк жарандардын келиши үчүн милдеттүү электрондук алдын ала каттоо тутумун, Thailand Digital Arrival Card (TDAC) киргизет.

Таиландга аба, кургактык же деңиз аркылуу кирүүгө ниеттенген бардык чет өлкөлүк жарандар, анын ичинде Кыргыз Республикасынын жарандары учуп кетээрге чейин 72 сааттан кечиктирбестен онлайн режиминде TDAC формасын толтурушу керек. Каттоо tdac.immigration.go.th расмий сайтында жүргүзүлөт.

TDAC формасын толтурууда сиз паспорттун реквизиттерин же башка жол жүрүү документинин маалыматын, арыз ээсинин жеке маалыматын, баруу максатын, Таиланддагы жашаган дарегин жана ден соолугуңуздун абалы жөнүндө маалымат беришиңиз керек. Анкета ийгиликтүү берилгенден кийин, арыз ээсинин электрондук дарегине тастыктоо жөнөтүлөт, ал Таиландга келгенде паспорттук көзөмөл кызматкерлерине көрсөтүлүшү керек.

Белгилей кетсек, TDAC киргизүү Кыргыз Республикасынын жарандары үчүн учурдагы визалык талаптарды жокко чыгарбайт. Жаңы система чек арадагы көзөмөл процедураларын тездетүүгө жана санитардык-эпидемиологиялык коопсуздукту чыңдоого багытталган.

TDAC системасы 2025-жылдын 28-апрелинен баштап алдын ала каттоо үчүн жеткиликтүү болот. Ушуга байланыштуу, Кыргыз Республикасынын Тышкы иштер министрлиги Таиландга сапарга чыгууну пландап жаткан жарандарга чек арадан өтүүдө мүмкүн болуучу кыйынчылыктарды болтурбоо үчүн жаңы талаптар менен алдын ала таанышып, өз убагында катталып турууну катуу сунуштайт.