Рас-Аль-Хайма Эмиратынын Соода жана өнөр жай департаментинин төрагасы Мохаммед Аль-Мусаббех Аль-Наими Тажикстанга иш сапары менен келди.

Сүйлөшүүлөрдүн жыйынтыгында Тажикстан Республикасынын Өнөр жай жана жаңы технологиялар министрлиги менен Меморандумга кол коюлду.

Документ Тажикстан Республикасынын 2040-жылга чейин жасалма интеллектти өнүктүрүү боюнча улуттук стратегиясынын негизинде эмират үчүн жасалма интеллект программаларын иштеп чыгууну карайт. Тактап айтканда, Рас аль-Хайма эмиратына жасалма интеллектке негизделген тажикстандык программалык камсыздоону экспорттоо, ошондой эле эмираттык адистердин ЖИ тармагындагы квалификациясын жогорулатуу пландаштырылууда.

Меморандум ошондой эле Тажикстандагы ЖИке негизделген финтех чечимдерине эмираттын инвестициясын камтыйт.

Мындан тышкары, Рас-Аль-Хаймадан түз инвестицияны Тажикстандын өнөр жай тармагына, анын ичинде тоо-кен, өндүрүш жана транспорттук логистикага багыттоо пландалууда. Рас аль-Хайма порту аркылуу Тажикстандан товарлардын дүйнөлүк экспортун илгерилетүү боюнча кызматташуу маселеси иликтенип жатат.

Белгилей кетсек, Тажикстан Борбордук Азияда биринчилерден болуп жасалма интеллект боюнча улуттук стратегияны кабыл алган. Бул чечимдин демилгечиси республиканын президенти Эмомали Рахмон болгон.

Маалымат үчүн: Рас аль-Хайма Эмираты Бириккен Араб Эмираттарын түзгөн жети эмирликтин бири. Эмират туризм, тоо-кен казып алуу жана өнөр жай өндүрүшү тез өскөн динамикалык экономикага ээ.

Сүрөт: Тажикстан Республикасынын өнөр жай жана жаңы технологиялар министрлиги