Россиянын стратегиялык изилдөөлөр институтунда “Эл аралык терроризмге каршы күрөшүү: Орусиянын мамилеси жана салымы” аттуу эл аралык конференция өттү. Иш-чаранын негизги катышуучуларынын бири Жамааттык коопсуздук келишим уюмунун (ЖККУ) башкы катчысынын орун басары Валерий Семериков болду.

Талкуунун жүрүшүндө Семериков ЖККУнун терроризмге жана ага байланыштуу коркунучтарга каршы күрөшүүдөгү системалуу иши тууралуу айтып берди. Ал уюмга мүчө-өлкөлөрдүн аракеттерин координациялоого жана биргелешкен операцияларды жүргүзүүгө мүмкүндүк берген колдонуудагы мыйзамдык базага өзгөчө көңүл бурду.

Анын айтымында, терроризмге, баңги затын мыйзамсыз жүгүртүүгө, мыйзамсыз миграцияга жана кибер кылмыштуулукка каршы күрөшүүнүн эң маанилүү инструменттери болуп «Жалданма», «Канал», «Нелегал» жана «ПРОКСИ» коддук аталыштары менен биргелешкен операциялар саналат. Бул операциялар ыкчам маалымат алмашууну гана эмес, коркунучтарды нейтралдаштыруу боюнча биргелешкен аракеттерди да камсыз кылат.

Конференцияга КМШнын жана ШКУнун коопсуздук органдарынын алдыңкы өкүлдөрү да катышты: Александр Манилов (КМШ Чек ара аскерлеринин командачылар кеңешинин координациялык кызматы), Сергей Зубков (КМШнын антитеррордук борбору) жана Артур Голованов (ШКУнун аймактык антитеррордук түзүмү).

Сөзүнүн аягында Валерий Семериков коопсуздукту камсыз кылуу эл аралык тыгыз кызматташтык аркылуу гана мүмкүн экенин баса белгиледи. Ал ЖККУнун бул жараяндагы негизги өнөктөштөрү катары Бириккен Улуттар Уюму (БУУ), КМШ жана Шанхай кызматташтык уюмун атады.

Сөздө тажик-ооган чек арасын бекемдөө боюнча максаттуу мамлекеттер аралык программаны ишке ашырууга өзгөчө көңүл бурулду. Семериков белгилегендей, бул долбоор ЖККУнун жоопкерчилик чөйрөсүндө туруктуулукту камсыз кылуунун эң маанилүү элементи болуп саналат.

Анын пикиринде, ишенимдүү, жакшы уюштурулган жана техникалык жактан жабдылган чек ара террористтик жана экстремисттик топтордун киришине тоскоол гана болбостон, бүтүндөй аймактын жалпы коопсуздугуна да салым кошот.

ЖККУнун тажрыйбасы жана практикасы комплекстүү мамиле – укуктук база, биргелешкен операциялар жана эл аралык өнөктөштүк – заманбап коопсуздук коркунучтары менен натыйжалуу күрөшүүнүн ачкычы экенин көрсөтүп турат.

Тажик-ооган чек арасын бекемдөө аймактык кызматташтык практикалык натыйжаларга жетишүүгө жана уюмга мүчө өлкөлөрдүн туруктуу жана тынчтыкта өнүгүүсү үчүн бекем пайдубал түзүүгө кандайча көмөктөшөөрүнүн ачык мисалы болуп саналат.

СУР0ТТ0: ачык булактардан