Бириккен Улуттар Уюму Өзбекстанда Агро-инновациялык хаб түзүү мүмкүнчүлүгүн карап жатат. Бул тууралуу республиканын айыл чарба министрлигинин басма сөз кызматы билдирди. Бул боюнча сүйлөшүүлөр БУУнун Деңизге чыга албаган өнүгүп келе жаткан өлкөлөр боюнча үчүнчү конференциясынын алкагында өтүп, анда Өзбекстандын айыл чарба министри Иброхим Абдурахманов БУУнун Башкы катчысынын орун басары Рабаб Фатима менен жолугушту. Жыйында Айыл чарба министрлигинин базасында Борбор Азия жана Кавказ өлкөлөрүндө айыл чарба тармагында илимий-изилдөө, технология алмашуу жана туруктуу айыл чарба тармагындагы аракеттерди координациялоо үчүн аянтча боло турган атайын борбор түзүү демилгеси көтөрүлдү. Рабаб Фатиманын айтымында, ФАО (БУУнун Азык-түлүк жана айыл чарба уюму) Өзбекстан тарабынан сунушталган Агро-инновациялык хабтын концепциясын азыртадан эле карап жатат. Мындай эки хаб болот деп күтүлүүдө – бири Африкада, экинчиси Өзбекстанда. Долбоорду даярдоо үчүн Өзбекстандын Айыл чарба министрлигинде катчылык түзүлдү, ал «Деңизге чыгууга мүмкүнчүлүгү жок өнүгүп келе жаткан өлкөлөр: азык-түлүк коопсуздугу жана туруктуу өнүгүү максаттары» темасынын алкагында аракеттерди жана эл аралык диалогду координациялайт. Тараптар демилгени ишке ашыруу процессин тездетүү жана адистештирилген эл аралык аянтчаларда талкууну улантуу боюнча макулдашышты.