ООГАНСТАН, 2025-жылдын 30-декабры – Karavan Info маалымат агенттиги. Өзбекстан Балх провинциясындагы Хайратан портунда жергиликтүү талиб өкүлдөрүнө 20 жүк ташуучу унаа менен 400 тонна азык-түлүк, дары-дармек жана медициналык жабдууларды жеткирди.

Балх провинциясынын администрациясынын басма сөз кызматы билдиргендей, дүйшөмбү күнү, 29-декабрда Балх провинциясына 10 түрдүү азык-түлүк, дары-дармектер жана медициналык жабдуулардан турган жардам жеткирилген.

Талибандын расмий өкүлдөрү гуманитардык жардамдын курамында 96 тонна ун, 22 тонна күрүч, 20 000 банка консерваланган уй эти, 22 тонна кумшекер, 20 000 литр күн карама майы, 180 000 банка даяр тамак, 40 тонна макарон жана 169 тонна ар кандай дары-дармектер жана медициналык жабдуулар бар экенин билдиришти.

Жардам тапшыруу аземине Балх губернатору Мохаммад Юсуф Вафа, Өзбекстандын Ооганстан боюнча атайын өкүлү Исматулла Иргашов, Өзбекстандын Сурхандарыя облусунун губернатору Улугбек Касимов, Балх Кызыл Жарым Ай коомунун аймактык директору Мирза Мохаммад Халид жана башка бир катар облустук жетекчилер катышты.

Балхтагы жергиликтүү бийлик өкүлдөрү гуманитардык жардам провинциядагы муктаж үй-бүлөлөргө жана саламаттыкты сактоо борборлоруна таратылаарын билдиришти.

Сүрөт: Tolo News