Өзбекстанда британиялык Vodafone жана финдик Nokia компанияларынын катышуусунда жаңы мобилдик оператордун ишке кириши күтүлүүдө. Ишкер Фарход Маматжанов 20-августта президент менен болгон жолугушууда билдиргендей, жаңы оператор 5G Standalone тармагын жайылтат. Долбоорго инвестициянын көлөмү 250 миллион еврону түзөт жана ишке киргизүү 2025-жылдын башына пландалууда.

UzTex Groupтун негиздөөчүсү жана InfinBankтын негизги акционери Фарход Маматжановдун айтымында, долбоор Өзбекстанды тез жана сапаттуу интернет менен камсыз кылууга багытталган. «Санариптештирүү шартында бизге чагылгандай ылдам интернет керек. Биз Vodafone менен биргеликте 5G Standalone мобилдик байланышын ишке киргизүү боюнча ишти баштадык», – деп белгиледи ал.

Долбоордун алкагында Nokia 5G тармагын ишке ашыруу үчүн жабдууларды жана технологияларды берет. Инвестицияга 100 миллион евро Финляндиянын Экспорт агенттигинен “Узпромкурулушбанк” аркылуу, ал эми калган 150 миллион евро түз эле түзүүчүлөрдөн тартылат.

Vodafone жана Nokiaдан тышкары, техникалык өнөктөш катары иштей турган долбоорго Emirates Telecommunications Group (e& – Etisalat) технологиялык тобу катышат.

Мурдараак маалымдалгандай, азыр менчиктештирилген Perfectum уюлдук оператору Nokia компаниясын тартуу менен Өзбекстанда 5G New Radio технологиясын киргизүүнү пландап жатат. Бул долбоор 5G Standalone New Radio (5G SA NR) технологиясына негизделген жаңы инфраструктураны түзүүнү камтыйт.

Учурда Өзбекстанда беш GSM мобилдик оператору иштейт: MobiUz, Beeline, Humans, Uzmobile жана Ucell. Perfectum мурда CDMA стандартында уюлдук кызматтарды көрсөткөн. Жаңы долбоор байланыштын сапатын бир топ жакшыртууну жана өлкөдө жогорку ылдамдыктагы интернеттин жеткиликтүүлүгүн жогорулатууну убада кылат.

Сүрөт: Pixabay.com/Pexes