Өзбекстандын президенти Шавкат Мирзиёевдин тун кызы Саида Мирзиёева президенттик аппараттын жетекчиси болуп дайындалды. Бул тууралуу өлкө башчынын басма сөз катчысы Шерзод Асадов билдирди.

Жаңы кызмат президенттин жарлыгы менен түзүлдү. Буга чейин Саида Мирзиёева 2023-жылдын августунан тарта президенттин жардамчысы, 2022-жылдын ноябрынан тарта Иш башкармалыгынын аткаруу аппаратында коммуникациялар жана маалымат саясаты секторун жетектеп келген.

Саида Мирзиёева ким?Саида Мирзиёева 1984-жылы 4-ноябрда Кокон шаарында туулган. Ал жогорку даражалуу советтик чиновниктин үй-бүлөсүнөн чыккан Шавкат Мирзиёев менен Зироатхон Хошимованын тун кызы. Саиданын Шахноза аттуу сиңдиси жана 2009-жылы туулган Миралишер аттуу иниси бар.

Билим берүү жана илимий ишмердүүлүкСаида Мирзиёева Дүйнөлүк экономика жана дипломатия университетин эл аралык укук адистиги боюнча аяктаган. Андан кийин Ташкент мамлекеттик юридикалык университетинде юриспруденция боюнча магистр даражасын (2008), ал эми 2010-жылы Ломоносов атындагы Москва мамлекеттик университетинде экономика боюнча магистр даражасын алган.

2021-жылы академик Владимир Квинттин жетекчилиги астында региондорду өнүктүрүү стратегиялары темасында экономика боюнча кандидаттык диссертациясын коргогон. Стратегиялык пландаштыруу, туруктуу өнүгүү жана дүйнөлүк тенденциялардын мамлекеттик саясатка таасирин баалоо боюнча илимий басылмалардын автору.