Министрлер Кабинетинин Төрагасынын орун басары – Суу чарба, айыл чарба жана кайра иштетүү өнөр жай министри Бакыт Төрөбаев Ош облусуна болгон жумушчу сапарынын алкагында Өзгөн районундагы күрүчтү кайра иштетүү жана таңгактоочу ишкананын ишмердүүлүгү менен таанышты.

Күрүч өндүрүү тармагында иш алып барган “Жаңы-Доор ЛТД” ишканасы Өзгөн районунун Төрт-Көл айыл аймагынын Прогресс айылында күрүчтү кайра иштетүү, таңгактоо жана экспорттоо боюнча муниципалдык логистикалык борбор түзүп, бул борбордун курулушун баштоого даярдык көрүүдө.

Өзгөндөн күрүчтү экспорттоо үчүн CASA 1000 долбоорунун алкагында 6 млн 800 миң сом каржыланып, ага экспортко керектүү заманбап жабдуулар алынган.

Кошумчалай кетсек, Агробизнестин атаандаштыкка жөндөмдүүлүгү борборунун ишмердүүлүгүнүн алкагында Өзгөн районунун күрүч чарбасын өнүктүрүүгө жылдык 1,5% менен 100 млн сом бөлүнгөн. Бул каражатка керектүү техникалар: тракторлор, комбайндар, экскаваторлор, HOWO, портерлер, чачуучу дрондор жана күрүч себүү үчүн башка техникалар сатылып алынат.

Жыйынтыгында дыйкан-фермерлердин жыйналган күрүч түшүмүн кайра иштетүүгө, себүүгө, жыйнап алууга жана экспорттоого мыкты шарттар түзүлүүдө.

Иш-чаранын жыйынтыгында мамлекеттик органдарга зарыл шарттарды түзүү жана инвесторлорду колдоо боюнча тиешелүү тапшырмалар берилип, бир катар чечимдер кабыл алынды.